Davlatimiz rahbari boshchiligida korrupsiyaning oldini olish va unga qarshi kurashish masalalariga bag‘ishlangan kengaytirilgan yig‘ilishda korrupsiyaning asosiy o‘choqlari, ayniqsa, mahalliy darajadagi muammolar ko‘tarildi.

Xalq deputatlari Toshkent shahar Yunusobod tumani kengashi deputati Erkin Omonov shu haqda fikr bildirdi: 

– Sakkiz yil avval hududlarni kompleks rivojlantirish maqsadida sektorlar tizimi joriy etilgan edi. Dastlab bu yondashuv o‘zining ijobiy natijalarini ko‘rsatdi. 

Biroq, keyingi yillarda ayrim mutasaddilarning sust ishlashi sababli muayyan kamchiliklar kuzatildi. Jumladan, prokurorlar, ichki ishlar xodimlari va soliq organlari vakillari sektor faoliyatini bahona qilib, o‘z asosiy yo‘nalishlarida samarali ishlamayotgani ma’lum bo‘ldi. 

         Endilikda davlatimiz rahbari taklifi bilan sektorlar faoliyati tugatildi. Ularning o‘rniga endilikda Bosh vazir o‘rinbosarlari o‘ziga tegishli sohalar bilan o‘z kuchi va tizimi bilan shug‘ullanishi belgilandi. 

Kambag‘allik, ijtimoiy himoya, tadbirkorlik bo‘yicha har bir insonga yetib boradigan islohotlar amalga oshirilmoqda. Endi bu ish uslubi tuman va mahallada jinoyatchilikni jilovlash, korrupsiyaning oldini olish bo‘yicha ham joriy qilinadi. 

Jinoyatchilik va korrupsiyaga qarshi samarali kurash olib borish uchun muammo ildizini aniqlash va unga huquqiy hamda institutsional javob berish zarur. Shu nuqtai nazardan, parlament qo‘mitalari jinoyatchilikning kelib chiqish sabablarini chuqur tahlil qilishi, har bir holat bo‘yicha aniq choralar belgilashi lozimligi qayd etildi. Bu nafaqat jinoyatlarning oldini olish, balki huquqiy va nazorat mexanizmlarini kuchaytirish orqali tizimli muammolarni hal etishga xizmat qiladi.

Korrupsiyaga qarshi kurashish milliy kengashi esa hududlarga bevosita tushib, yig‘ilishlarni muammolar o‘chog‘ida o‘tkazishi va har oyda jinoyatchilikning oldini olish borasidagi chora-tadbirlarni joyida o‘rganib borishi lozimligi davlatimiz rahbari tomonidan alohida ta’kidlab o‘tildi.

Aytib o‘tish kerakki, jamiyatda nuroniylar katta hayotiy tajribaga ega shaxslar sifatida korrupsiyaga qarshi kurashishda muhim rol o‘ynaydi. Ular yoshlarga halollik va adolat tamoyillarini singdirishda, davlat va jamoat tashkilotlariga maslahat berishda faol ishtirok etishlari lozim. Nuroniylar o‘z so‘zlari va amaliy ishlari orqali halollikni targ‘ib qilishi, korrupsiyaga qarshi kurashish madaniyatini shakllantirishda muhim omil bo‘lishlari mumkin.

Xulosa qilib aytganda, Prezidentimiz tomonidan ilgari surilgan takliflar jinoyatchilikka qarshi kurashda yangi bosqichni boshlab beradi. Endilikda bu jarayon nafaqat huquq-tartibot organlarining vazifasi, balki Senat, parlament qo‘mitalari va mahalliy kengashlarning ham faol ishtirokini talab etadi. Maqsad esa bitta – jinoyatchilik va korrupsiyadan xoli, xavfsiz jamiyatni barpo etish.

Shunday ekan barchamiz mas’uliyatni his qilgan holda, korrupsiyaga qarshi kurashish bu faqat davlat organlarining emas, balki har birimizning zimmamizdagi vazifa ekanini anglamog‘imiz zarur. Har bir insonda halollik, mas’uliyat hissiga yo‘g‘rilgan fuqarolik pozitsiyasi bo‘lsa, jamiyatda korrupsiyaga qarshi kurashish samarali bo‘ladi.

                                               N.Abduraimova,

O‘zA