Taʼkidlanishicha, ushbu maxsus kutubxona maʼmuriy binosini yangidan qurish va jihozlash boʻyicha amalga oshirilgan qiymati 10,4 mlrd soʻmlik pudrat ishlari oʻrganilib, jami 530,4 mln soʻmlik ishlar haqiqatda bajarilmagan boʻlsada, hisobotlarga qoʻshib yozish yoʻli bilan byudjet mablagʻlari talon-toroj qilingani aniqlandi.

Achinarlisi, kutubxonani jihozlash maqsadida ajratilgan 2 ta “brayl” printeri uchun 90 mln. soʻm va 1 ta ovoz yozish studiyasi uchun 50 mln soʻm mablagʻlar ham oʻzlashtirib yuborilgani oqibatida koʻrish qobiliyatida nuqsoni bor shaxslarni qoraqalpoq tilida zarur adabiyot va audio materiallar bilan taʼminlash imkoni cheklangan.

Mazkur holat yuzasidan JKning 167-moddasi (Oʻzlashtirish yoki rastrata yoʻli bilan talon-toroj qilish) 3-qismi “a” bandi hamda 209-moddasi (Mansab soxtakorligi) 1-qismi bilan jinoyat ishi qoʻzgʻatildi.

Hozirda tergov harakatlari olib borilib, yetkazilgan zararni qoplash choralari koʻrilmoqda.

“Yangi Oʻzbekiston” va “Pravda Vostoka” gazetalari tahririyati