Shaxslarning tasvirga bo‘lgan huquqlarini mustahkamlashga qaratilgan qonun loyihasi jamoatchilik muhokamasiga qo‘yildi.

Fuqarolik kodeksiga ko‘ra, shaxslarning tasvirga bo‘lgan huquqi daxlsiz. Shunga qaramay, ushbu huquqni ta’minlash borasida qonunchilikda bo‘shliqlar mavjud.

Insonning tasvirga bo‘lgan huquqini mustahkamlash maqsadida Adliya vazirligi tomonidan milliy huquqni qo‘llash amaliyoti va 30 ga yaqin xorijiy davlatlar tajribasi tahlil qilindi. 

Tegishli qonun loyihasi ishlab chiqildi hamda aholi fikrini o‘rganish maqsadida jamoatchilik muhokamasiga joylashtirildi.

Loyihaga ko‘ra, endilikda umumiy qoida tariqasida, har qanday kishini foto yoki video tasvirga olish yoki ushbu tasvirdan foydalanish uchun uning roziligi talab qilinadi.

Shu bilan birga, loyihaga ko‘ra, 16 yoshdan boshlab o‘smirlar ularni tasvirga olish, tasvirdan foydalanish uchun mustaqil rozilik bera oladi. Jamoat joylarida va ommaviy tadbirlarda tasvirga olish uchun ruxsat talab qilinmaydi.

Davlat xizmatchilarini xizmat vazifasi vaqtida cheklovsiz tasvirga olish va ushbu tasvirdan foydalanish mumkin. Noqonuniy harakatlarni tasvirga olish uchun rozilik shart emas.

Videokuzatuv tizimlari haqida ogohlantiruvchi belgilar o‘rnatilishi shart. Kishilarning qisman yoki to‘liq kiyimsiz bo‘lishni taqozo etadigan joylarda (tibbiyot xonasi, hammom, kiyim almashtirish xonalari va boshqa) videokuzatuvni amalga oshirish taqiqlanadi.

Agar tasvirdan rozilik berilgan maqsaddan boshqa maqsadda yoki inson sha’ni va qadr-qimmatini kamsitadigan tarzda foydalanilsa, rozilik bekor qilinishi mumkin.

N.Abduraimova,

O‘zA