Kuni kecha O‘zbekiston Respublikasi “Bolalarni ularning sog‘lig‘iga zarar yetkazuvchi axborotdan himoya qilish to‘g‘risida”gi Qonuni ijrosini monitoring qilish bo‘yicha Bolalar ombudsmani rahbarligidaga idoralararo ishchi guruhining navbatdagi yig‘ilishi o‘tkazildi.

 Ishchi guruh tarkibida O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi, Oila va xotin-qizlar qo‘mitasi, O‘quvchilarni kasb-hunarga yo‘naltirish va psixologik-pedagogik respublika tashxis markazi va Bolalar tashkiloti vakillari faoliyat ko‘rsatmoqda.

Yig‘ilishda respublikamizda bolalarni ularning sog‘lig‘iga zarar yetkazuvchi axborotdan himoya qilishning real holati hamda bu borada mas’ul davlat organlari tomonidan amalga oshirilgan ishlar muhokama qilindi.

Xususan, 7 yoshdan 16 yoshgacha bo‘lgan 16 ming nafar o‘quvchi bolalar o‘rtasida o‘tkazilgan so‘rovda har 10 nafar boladan 8 tasi bevosita o‘z uyidan internetga ulanishini bildirgan.

Shuningdek, joriy yilning o‘tgan davri mobaynida Axborot va ommaviy kommunikatsiyalar agentligi tomonidan Qonun talablari buzilgan axborotlarni bartaraf etish talabi bilan 606 ta xabarnoma yuborilgan hamda mazkur yo‘nalish bo‘yicha 5250 ta axborot resursning identifikatsiya ma’lumotlari taqiqlangan axborot mavjud bo‘lgan butunjahon Internet tarmog‘ining axborot resurslari reyestriga kiritilganligi bildirildi.

Yig‘ilish yakunida ushbu sohadagi mavjud muammolarni hal qilish hamda qonunchilikni takomillashtirish bo‘yicha takliflar ilgari surildi.

Ishchi guruh o‘z faoliyatini davom ettirmoqda.

Bolalar ombudsmani rasmiy telegram-kanali