18-mart kuni Toshkentda BMT Xavfsizlik Kengashining "Ayollar, tinchlik va xavfsizlik" nomli 1325-son rezolyutsiyasini amalga oshirishdagi yutuqlarni baholashga bag‘ishlangan Markaziy Osiyo davlatlari vakillarining uchrashuvi bo‘lib o‘tdi.

Tadbirda rasmiy delegatlar, ekspertlar, fuqarolik jamiyati faollari, xalqaro hamkorlar, BMT tuzilmalari va boshqa xalqaro tashkilotlar vakillari ishtirok etdi.

Uchrashuv davomida mamlakatlar tomonidan 1325-sonli rezolyutsiyani amalga oshirish doirasida Milliy harakatlar rejalarini bajarish bo‘yicha erishilgan yutuqlar to‘g‘risida hisobotlar taqdim etildi.

Tinchlikni ta’minlash jarayonlarida ayollarning rolini kuchaytirish, mojarolar sharoitida ayollar huquqlarini himoya qilish mexanizmlarini takomillashtirish, shuningdek, ushbu yo‘nalishdagi institutsional va qonunchilik asoslarini mustahkamlash bo‘yicha sezilarli yutuqlarga erishilganligi qayd etildi. Gender tenglikni ta’minlash va ushbu tuzilmalarda ayollar ishtirokini kengaytirish uchun huquqni muhofaza qilish organlari va qurolli kuchlar bilan ishlashga alohida e’tibor qaratildi.

Mintaqa mamlakatlari o‘rtasida hamkorlikni kuchaytirish, ilg‘or tajribalar almashish, gender tenglikni ta’minlash va tinchlikni mustahkamlash bo‘yicha qo‘shma tashabbuslarni ishlab chiqish imkonini beradigan 1325-sonli rezolyutsiya bo‘yicha Mintaqaviy dasturni yaratish istiqbollariga alohida ahamiyat berildi. Ishtirokchilar inqiroz va mojarolar sharoitida ayollar va qizlar huquqlarini himoya qilishga qaratilgan dasturlar samaradorligini oshirish uchun hamkorlikda ishlash zarurligini ta’kidladilar.

Mintaqaviy dastur va Milliy harakatlar rejalari amalga oshirilishini nazorat qilish uchun mintaqaviy muvofiqlashtirish mexanizmini tashkil etish taklif qilindi.

Bundan tashqari, zamonaviy xatarlar va ustuvor yo‘nalishlarni hisobga olgan holda yangi Milliy harakatlar rejalarini ishlab chiqish masalalari muhokama qilindi. Ishtirokchilar tinchlik o‘rnatish sohasida yangi yondashuvlarni joriy etish, ayollarning iqtisodiy imkoniyatlarini kengaytirish va qarorlar qabul qilish jarayonlarida ularning faol ishtirokini ta’minlash muhimligini ta’kidladilar.

Yangi Milliy harakatlar rejalariga ayollarga nisbatan zo‘ravonlikning oldini olish, ularning iqtisodiy mustaqilligini oshirish, ayollar va qizlar uchun ta’lim dasturlarini kengaytirish bo‘yicha kuchaytirilgan chora-tadbirlarni kiritish taklif etildi.

Ishtirokchilar 1325-sonli rezolyutsiyani amalga oshirish samaradorligini yaxshilash uchun fuqarolik jamiyati va yoshlar bilan faol hamkorlik qilish zarurligini qayd etdilar. Xalqaro tashkilotlar vakillari mintaqa mamlakatlariga yangi strategiyalarni ishlab chiqish va joriy etishni texnik va ekspertlar yordamini ko‘rsatish orqali qo‘llab-quvvatlashga tayyorligini bildirdilar.

Uchrashuv yakunida tomonlar Markaziy Osiyoda 1325-sonli rezolyutsiya maqsadlarini yanada ilgari surish uchun o‘zaro hamkorlikni davom ettirish, eng yaxshi amaliyotlar bilan almashish va sa’y-harakatlarni muvofiqlashtirish bo‘yicha kelishib oldilar. Bu borada taraqqiyotni kuzatib borish va o‘zgaruvchan sharoitlarga mos ravishda strategiyalarni moslash uchun muntazam uchrashuvlar va forumlar o‘tkazishga qaror qilindi.

Inson huquqlari bo‘yicha

O‘zbekiston Respublikasi

Milliy markazining

matbuot xizmati