Bolalar ombudsmaniga o‘tgan yilda O‘zbekiston Respublikasi va xorijiy davlatlar fuqarolari, ombudsmanlar, fuqaroligi bo‘lmagan shaxslar, jamoat tashkilotlari va boshqa yuridik shaxslar tomonidan jami 1 ming 64 murojaat kelib tushgan. 2023 yilga nisbatan solishtirganda murojaatlar salmog‘i 2,4 baravarga oshgan.

Bu ma’lumotlar Senatning Yoshlar, xotin-qizlar, madaniyat va sport masalalari qo‘mitasi majlisida qayd etildi. 

Majlisda Oliy Majlisning Bola huquqlari bo‘yicha vakili (Bolalar ombudsmani)ning bola huquqlari to‘g‘risidagi qonunchilikka davlat organlari tomonidan rioya etilishi haqidagi ma’ruzasi ko‘rib chiqildi.

Ta’kidlanganidek, 2024 yilda bola huquqlari sohasidagi qonunchilikdagi mavjud muammolar tahlili asosida davlat organlari va tashkilotlariga 40 ta tahliliy axborot kiritilgan.

Fuqarolarning murojaatlari va bolalarga nisbatan sodir etilgan jinoyatlarga oid sud xabarnomalari asosida Bolalar ombudsmani va uning kotibiyati xodimlari 46 ta fuqarolik, jinoiy va ma’muriy ishlar yuzasidan sudlarda kuzatuvchi sifatida ishtirok etgan.

Bola huquqlari bo‘yicha vakilning 35 shaxsiy qabuli tashkil etilgan bo‘lib, ularda jismoniy va yuridik shaxslarning jami 160 murojaati ko‘rib chiqilgan.

Bolalar ombudsmani murojaatlar tahlili va monitoringi asosida davlat organlari tomonidan bola huquqlari va qonuniy manfaatlari buzilishiga yo‘l qo‘yilgani yuzasidan munosabat bildirib, 9 ogohlantirish, 3 taqdimnoma, 18 xulosa va sud hujjati ustidan protest keltirish to‘g‘risida 6 iltimosnoma kiritgan.

Tadbirda vazirlik va idoralar vakillarining O‘zbekistonda bola huquqlari va qonuniy manfaatlarini ta’minlash sohasidagi islohotlar, qonun bilan ziddiyatda bo‘lgan bolalarning holati hamda ayrim sohalarda bolaning eng ustun manfaatlarini ta’minlashga doir masalalar yuzasidan fikr va mulohazalari eshitildi.

Majlis yakunida ko‘rib chiqilgan masala yuzasidan qo‘mitaning tegishli qarori qabul qilindi.

N.Abduraimova,

O‘zA