Oliy Majlis Qonunchilik palatasidagi siyosiy partiyalar fraksiyalarining yig‘ilishlarida “Milliy qonunchilikning nogironligi bo‘lgan shaxslarning huquqlariga oid O‘zbekiston Respublikasining xalqaro shartnomalariga muvofiqlashtirilishi hamda aholining ijtimoiy himoyaga muhtoj qatlamlarini davlat tomonidan qo‘llab-quvvatlash tizimining yanada takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi O‘zbekiston Respublikasi qonuni loyihasi ko‘rib chiqildi.
— Mazkur qonun loyihasida nogironligi bo‘lgan shaxslar va “Ijtimoiy reyestr”ga kiritilgan fuqarolarga davlat tomonidan taqdim etilgan imtiyozlar, qo‘llab-quvvatlashlarni qonun darajasida mustahkamlash nazarda tutilmoqda, — deydi deputat Sevara Ubaydullayeva. — Qonun loyihasi bilan nogironligi bo‘lgan shaxslar va “Ijtimoiy reyestr”ga kiritilgan fuqarolarga soliq imtiyozlari berilmoqda. Bu imtiyozlarni belgilashda 1-, 2-guruh nogironligi bo‘lgan shaxslarga yer, mol-mulk soliqlarida proaktiv shaklda to‘g‘ridan-to‘g‘ri foydalanish imkoniyati yaratilmoqda.
Shuningdek, nogironligi bo‘lgan shaxslarni ishga olgan yoki ularga ijtimoiy xizmatlar ko‘rsatuvchi tadbirkorlik sub’ektlariga ham soliq imtiyozlari belgilanmoqda. Bunda yuridik shaxslarga ijtimoiy soliq stavkasini 1 foiz miqdorida hisoblash, YATTga esa hisoblamaslik taklif etilyapti. Kamida 4 nafar nogironligi bo‘lgan shaxsni ishga olgan yuridik shaxslar mol-mulk solig‘ini to‘lashdan ham ozod etiladi.
Shuningdek, shaxsni nogironlik belgilariga ko‘ra kamsitganlik uchun jinoiy javobgarlik belgilanmoqda.
Loyihadagi normalar nogironligi bo‘lgan shaxslarni qo‘llab-quvvatlash, ular uchun belgilangan imtiyozlarni qonun darajasida mustahkamlashga xizmat qiladi, — deydi deputat.
Fraksiyalar yig‘ilishlarida qonun loyihasi muhokama qilinib, tegishli qarorlar qabul qilindi.
Muhtarama Komilova, O‘zA