O‘zbekiston Respublikasi Prezidenti 2025-yil 19-iyun kuni «Davlat fuqarolik xizmatini yangi yondashuvlar asosida tashkil etish hamda professional va natijadorlikka yo‘naltirilgan davlat xizmatchilari korpusini shakllantirish chora-tadbirlari to‘g‘risida»gi farmonni imzoladi. Bu haqda O‘zA xabar bermoqda.

Farmonga ko‘ra, davlat fuqarolik xizmatchilari – xizmat vazifalarini bajarishda odob-axloq qoidalariga qat’iy rioya etishini ta’minlash va kasbiy madaniyatini rivojlantirish orqali davlat organlariga nisbatan jamoatchilik ishonchini mustahkamlash mexanizmlari joriy qilinadi.

Shuningdek, Davlat xizmatini rivojlantirish agentligi:

• ochiq va adolatli tanlovlar asosida davlat xizmatiga eng munosib kadrlarni jalb qiladi, shuningdek, ularning gorizontal va vertikal kareraviy o‘sishiga ko‘maklashadi;

• davlat xizmatchilarining salohiyati va kasbiy kompetensiyalarini diagnostikadan o‘tkazadi va natijalariga ko‘ra xodimning portfoliosini shakllantiradi;

• talab yuqori bo‘lgan mutaxassisliklar va yo‘nalishlar bo‘yicha ehtiyojlarni o‘rganadi hamda ushbu yo‘nalishda davlat xizmatchilarining xorijda maqsadli stajirovka o‘tashi yuzasidan buyurtmalarni shakllantiradi;

• «El-yurt umidi» jamg‘armasi stipendiatlarining gorizontal va vertikal kareraviy o‘sishi bo‘yicha zarur choralarni ko‘radi.

• Bundan tashqari, ushbu yo‘nalishda Davlat siyosati va boshqaruvi akademiyasi va «El-yurt umidi» jamg‘armasining ham vazifalari belgilanmoqda.

Sohani tubdan isloh qilish maqsadida 2026-yil 1-yanvardan boshlab quyidagicha tartiblar o‘rnatiladi:

• davlat xizmatiga birinchi marta qabul qilingan davlat xizmatchilari bilan mehnat shartnomasi dastlab bir yil muddatga tuziladi va keyinchalik faoliyatining ijobiy natijalariga ko‘ra mehnat shartnomasi nomuayyan muddatga uzaytiriladi;

• davlat xizmatiga birinchi marta qabul qilingan davlat xizmatchilari majburiy «Davlat xizmatiga kirish» maxsus kurslarini va keyinchalik har uch yilda kamida bir marotaba malaka oshirish kurslarini o‘taydi hamda mazkur kurslarning yakunlari bo‘yicha ularning nazariy bilim va ko‘nikmalari diagnostikadan o‘tkaziladi;

• diagnostikada davlat xizmatchilarining tegishli soha va tarmoq bo‘yicha bilim darajasi, hujjatlarni tuzish va davlat tilida ish yuritish ko‘nikmalari, tahliliy, rahbarlik va kommunikativlik malakalari, kompyuter savodxonligi, qonunchilikdagi yangiliklarni, O‘zbekiston tarixi va xorijiy tillarni o‘zlashtirganligi, umumiy eruditsiyasi, psixologik diagnozi va intellektuallik koeffitsiyenti (IQ) kabi ko‘rsatkichlari baholanadi;

• monitoring tizimi tahlili natijalariga ko‘ra, xodimning mavjud bilim va ko‘nikmalarini kasbiy rivojlantirish xaritasi – portfoliosi yaratiladi;

• kasbiy rivojlantirish xaritasi asosida davlat xizmatchisi rivojlantirishi lozim bo‘lgan «yumshoq» va «qattiq» ko‘nikmalari bo‘yicha majburiy malaka oshirish, shu jumladan, mustaqil ta’lim olish dasturini o‘taydi va boshqalar.

• Davlat xizmati lavozimlarini egallash bo‘yicha tanlov o‘tkazishda 2025-yil 1-avgustdan boshlab yangicha tartib belgilanmoqda. Jumladan:

• respublika, hududiy va tuman (shahar) darajasidagi tashkilotlardagi lavozimlarning boshqaruv va yordamchi guruhlari uchun tanlovlar faqatgina Davlat fuqarolik xizmatchilari vakant lavozimlarining yagona portali orqali o‘tkaziladi;

• qonunchilikda lavozimga tayinlashda tegishli organlar bilan kelishilishi lozim bo‘lgan lavozimlar bo‘yicha kelishuv ushbu organlarning vakillarini tanlov komissiyasi tarkibiga kiritish yo‘li bilan amalga oshiriladi;

• test sinovlari davlat xizmatchilarini sinovdan o‘tkazish moduli orqali maxsus jihozlangan xonalarda yoki masofaviy onlayn tizim orqali o‘tkaziladi.

Prezident  Farmoni bilan quyidagi hujjatlar tegishli ilovalarga muvofiq tasdiqlandi:

1. Davlat fuqarolik xizmatini 2030-yilgacha rivojlantirish strategiyasi;

2. Davlat fuqarolik xizmatini 2030-yilgacha rivojlantirish strategiyasining maqsadli ko‘rsatkichlari;

3. Davlat fuqarolik xizmatini 2030-yilgacha rivojlantirish strategiyasini amalga oshirish bo‘yicha 2025-2026-yillarga mo‘ljallangan chora-tadbirlar dasturi;

4. Davlat fuqarolik xizmati tatbiq qilinadigan davlat organlari va tashkilotlari ro‘yxati;

5. Respublika, hududiy va tuman darajasidagi davlat organlari davlat fuqarolik xizmati lavozimlarining davlat reyestri;

6. Milliy darajadagi davlat organlari davlat fuqarolik xizmati lavozimlarining davlat reyestri;

7. Davlat fuqarolik xizmati lavozimini egallash uchun tanlov o‘tkazish tartibi to‘g‘risida nizom;

8. Milliy kadrlar zaxirasini shakllantirish va yuritish tartibi to‘g‘risida nizom;

9. Davlat fuqarolik xizmatchilariga malaka darajalarini berish tartibi to‘g‘risida nizom;

10. Davlat fuqarolik xizmatchilarining kasbiy kompetensiyalarini uzluksiz ravishda oshirish tartibi to‘g‘risida nizom.

O‘z navbatida,  Farmon ijrosini tashkil etish, ta’minlash va nazorat qilish ishlarini ta’minlash borasida O‘zbekiston Respublikasi Prezidentining ayrim hujjatlariga tegishli o‘zgartirish va qo‘shimchalar kiritish belgilandi. Prezidentning ayrim hujjatlari o‘z kuchini yo‘qotgan deb hisoblanishi ko‘rsatib berildi.

Inson huquqlari bo‘yicha

O‘zbekiston Respublikasi

Milliy markazining

matbuot xizmati