Prezidentning "Fuqarolarning vijdon erkinligi huquqi kafolatlarini yanada mustahkamlash hamda diniy-ma’rifiy sohadagi islohotlarni yangi bosqichga olib chiqish chora-tadbirlari to‘g‘risida"gi farmoniga muvofiq Din ishlari bo‘yicha qo‘mita to‘g‘risida nizom tasdiqlandi. U quyidagilarni belgilaydi:

• Din ishlari bo‘yicha qo‘mitaning maqomi, asosiy vazifalari va funksiyalari;
• qo‘mitaning vakolatlari va javobgarligi, shuningdek uning faoliyatini tashkil etish tartibi;
• Din ishlari bo‘yicha qo‘mita rahbariyatining asosiy funksional majburiyatlari va javobgarligi;
• qo‘mitani moliyalashtirish, uning xodimlari mehnatiga haq to‘lash va moddiy rag‘batlantirish tartibi.

Qo‘mitaning asosiy vazifalari:

• vijdon erkinligi va diniy tashkilotlar to‘g‘risidagi qonunchilik hujjatlariga muvofiq din ishlari sohasida yagona davlat siyosatini amalga oshirish, ushbu jarayonda davlat va jamoat tashkilotlarining o‘zaro hamkorligini yo‘lga qo‘yish;
• dunyoviy davlat prinsipini ro‘yobga chiqarish, fuqarolarning vijdon erkinligi kafolatlarini, aholining dini va e’tiqodidan qat’i nazar huquqlari to‘liq ro‘yobga chiqarilishini ta’minlash, vijdon erkinligi buzilishining har qanday ko‘rinishini oldini olish;
• diniy mutaassiblik, ekstremizm va terrorizm g‘oyalarini tarqatish, turli konfessiyalar o‘rtasida adovatni yuzaga keltirishga qaratilgan xatti-harakatlarning oldini olish, ularning o‘zaro ahil-inoq va hamjihat hayot kechirishini qo‘llab-quvvatlash choralarini ko‘rish;
• jamiyatda diniy-ma’rifiy muhit barqarorligi va e’tiqod erkinligiga tahdid tug‘dirishi mumkin bo‘lgan omillarni o‘rganish, tahlil qilish va ularning oldini olish bo‘yicha takliflar ishlab chiqish, hamda ushbu jarayonlarda diniy-ma’rifiy soha vakillarining ishtirokini kengaytirish;
• davlat organlarining diniy tashkilotlar bilan o‘zaro aloqasi va hamkorligini muvofiqlashtirish hamda davlat siyosatida diniy tashkilotlar manfaatlarini aks ettirish va boshqalar.

 
Shuningdek, qo‘mita "Haj" tadbiriga boruvchi fuqarolarning yagona elektron navbati hamda "Umra" tadbirlariga yuboriladigan ziyoratchilarning elektron ro‘yxatini shakllantiradigan "Haj va Umra yagona portali" faoliyatini moliyalashtirish, texnik qo‘llab-quvvatlash uchun mas’ul davlat organi hisoblanadi.

Kun.uz