Президентнинг "Фуқароларнинг виждон эркинлиги ҳуқуқи кафолатларини янада мустаҳкамлаш ҳамда диний-маърифий соҳадаги ислоҳотларни янги босқичга олиб чиқиш чора-тадбирлари тўғрисида"ги фармонига мувофиқ Дин ишлари бўйича қўмита тўғрисида низом тасдиқланди. У қуйидагиларни белгилайди:

• Дин ишлари бўйича қўмитанинг мақоми, асосий вазифалари ва функциялари;
• қўмитанинг ваколатлари ва жавобгарлиги, шунингдек унинг фаолиятини ташкил этиш тартиби;
• Дин ишлари бўйича қўмита раҳбариятининг асосий функционал мажбуриятлари ва жавобгарлиги;
• қўмитани молиялаштириш, унинг ходимлари меҳнатига ҳақ тўлаш ва моддий рағбатлантириш тартиби.

Қўмитанинг асосий вазифалари:

• виждон эркинлиги ва диний ташкилотлар тўғрисидаги қонунчилик ҳужжатларига мувофиқ дин ишлари соҳасида ягона давлат сиёсатини амалга ошириш, ушбу жараёнда давлат ва жамоат ташкилотларининг ўзаро ҳамкорлигини йўлга қўйиш;
• дунёвий давлат принципини рўёбга чиқариш, фуқароларнинг виждон эркинлиги кафолатларини, аҳолининг дини ва эътиқодидан қатъи назар ҳуқуқлари тўлиқ рўёбга чиқарилишини таъминлаш, виждон эркинлиги бузилишининг ҳар қандай кўринишини олдини олиш;
• диний мутаассиблик, экстремизм ва терроризм ғояларини тарқатиш, турли конфессиялар ўртасида адоватни юзага келтиришга қаратилган хатти-ҳаракатларнинг олдини олиш, уларнинг ўзаро аҳил-иноқ ва ҳамжиҳат ҳаёт кечиришини қўллаб-қувватлаш чораларини кўриш;
• жамиятда диний-маърифий муҳит барқарорлиги ва эътиқод эркинлигига таҳдид туғдириши мумкин бўлган омилларни ўрганиш, таҳлил қилиш ва уларнинг олдини олиш бўйича таклифлар ишлаб чиқиш, ҳамда ушбу жараёнларда диний-маърифий соҳа вакилларининг иштирокини кенгайтириш;
• давлат органларининг диний ташкилотлар билан ўзаро алоқаси ва ҳамкорлигини мувофиқлаштириш ҳамда давлат сиёсатида диний ташкилотлар манфаатларини акс эттириш ва бошқалар.

 
Шунингдек, қўмита "Ҳаж" тадбирига борувчи фуқароларнинг ягона электрон навбати ҳамда "Умра" тадбирларига юбориладиган зиёратчиларнинг электрон рўйхатини шакллантирадиган "Ҳаж ва Умра ягона портали" фаолиятини молиялаштириш, техник қўллаб-қувватлаш учун масъул давлат органи ҳисобланади.

Kun.uz