Inson huquqlari bo'yicha O'zbekiston Respublikasi Milliy markazi tomonidan joriy yilning 25 avgust kuni Xorazm viloyati, Xiva shahridagi “Bolalar shaharchasi”da O'zbekiston Respublikasi Prezidentining 2021 yil 9 avgustda qabul qilingan “Yetim bolalar va ota-ona qaramog'idan mahrum bo'lgan bolalarni tarbiyalashning tubdan yangilangan tizimini joriy etish chora-tadbirlari to'g'risida”gi qaroriga bag'ishlangan davra suhbati bo'lib o'tdi.

Tadbir davomida O'zbekistonda bola huquqlarini himoya qilish sohasida amalga oshirilayotgan islohotlar, bu boradagi xalqaro standartlarni milliy qonunchilikka implementatsiya qilish jarayonlari, yetim va ota-onasi qaramog'isiz qolgan bolalar uchun yaratilayotgan sharoitlar, xususan, ularning sifatli ta'lim olishlari uchun davlatimiz tomonidan berilayotgan imkoniyatlar haqida so'z bordi.

Bu boradagi davlatimiz rahbari imzolgan yangi qarorning mazmun-mohiyati, unda qo'yilgan vazifalar yuzasidan atroflicha ma'lumot berildi.

Shuningdek, o'qish jarayonida raqamli vositalardan foydalanish bilan bog'liq samarador tajriba va uslublar haqida ham fikr almashildi.

Tadbir so'ngida Inson huquqlari bo'yicha O'zbekiston Respublikasi Milliy markazi tomonidan chop etilgan kitoblar “Bolalar shaharchasi” kutubxonasiga beg'araz taqdim etildi.

Inson huquqlari bo'yicha
O'zbekiston Respublikasi
Milliy markazining
matbuot xizmati