2021 yilning 21 avgust kuni mamlakatimiz miqyosida umumxalq obodonlashtirish xayriya hashari bo'lib o'tdi. Unda Inson huquqlari bo'yicha O'zbekiston Respublikasi Milliy markazi xodimlari ham faol ishtirok etib, yurtimiz obodligi va ko'rkamligiga munosib hissa qo'shishdi.
“Ozoda joyda fayzu baraka va sihat-salomatlik bo'ladi”, degan hikmatli naqlga rioya etgan mehnatsevar hamkasblarimiz ko'chalarni supurib, daraxtlarni oqlashdi. Daraxtlar tagini yumshatib, bog'dorchilik ishlari bilan ham shug'ullanishdi.
“Mahallalarni obodonlashtirish” oyligi doirasida o'tkazilgan ushbu keng ko'lamli umumxalq xayriya hasharini Markaz xodimlari ahillik, hamjihatlik va ko'tarinki kayfiyatda o'tkazishdi.
Bu kabi tadbirlar shaharu qishloqlarimizni yanada ko'rkamlashtirish, atrof-muhit ozodaligini ta'minlash, aholi o'rtasida sog'lom turmush tarzini targ'ib qilish kabi maqsadlarda vatandoshlarimizni hamjihatlikka chorlashi bilan ham ahamiyatli. Zero, yurtimizni obod etishga har birimiz mas'ulmiz.
Azizbek RAMAZONOV,
“Demokratlashtirish va inson huquqlari”
jurnali mas'ul kotibi