Европа комиссияси Facebook ва Instagram ижтимоий тармоқлари томонидан интернетда болалар ва ўсмирларни ҳимоя қилиш бўйича Европа стандартлари бузилиши эҳтимолини текширмоқда.

Европа комиссияси Facebook ва Instagram ижтимоий тармоқларига эгалик қилувчи Американинг Meta технология корпорациясига қарши болалар ва ўсмирларни ҳимоя қилиш бўйича етарли чоралар кўрилмагани учун расмий суриштирув бошлади. Брюссел уни вояга етмаган фойдаланувчиларни ҳимоя қилиш бўйича махсус мажбуриятларни юклайдиган рақамли хизматлар тўғрисидаги Европа қонуни (DAS)ни бузганликда гумон қилинмоқда, деб хабар қилди Европа идораси 16 май, пайшанба куни. 

«Қуён уйи эффекти» 

Брюссел Facebook ва Instagram ижтимоий тармоқлари ҳамда уларга ўрнатилган алгоритмлар болаларда ўзига қарамлик хулқ-атворининг ривожланишига ҳисса қўшиши мумкин деб гумон қилмоқда, деб таъкидлади Еврокомиссия вакили. У «қуён уйи эффекти» деб аталувчи ҳодисанинг пайдо бўлишига ишора қилди, бунда фойдаланувчи бир саҳифадан иккинчисига қайта-қайта ўтиб, асл мақсадини ва вақт ҳиссини йўқотади. 

Бошқа нарсалар қаторида, у болаларни номақбул контентдан ҳимоя қилиш учун Meta фойдаланувчиларнинг ёшини текшириш бўйича жорий этган чораларни кўриб чиқади. АҚШ корпорацияси «Facebook ва Instagram платформаларида ёш европаликларнинг жисмоний ва руҳий саломатлигига салбий таъсир кўрсатиш хавфини минималлаштириш учун етарлича ҳаракат қилмаяпти», деди Европа Иттифоқининг ички бозор бўйича комиссари Терри Бретон. 

TikTok’га қарши ҳам суриштирув жараёни давом этмоқда 

Худди шундай суриштирув TikTok ижтимоий тармоғига нисбатан ҳам олиб борилмоқда. Платформа «вояга етмаганларни ҳимоя қилиш, реклама шаффофлиги, тадқиқотчиларнинг маълумотларга кириши ҳамда дизайн ва зарарли контент билан боғлиқ хавфларни бошқариш каби соҳаларда текширувдан ўтказилмоқда», дея маълум қилди Брюссел. Агар TikTok DSA қоидаларини бузганликда айбдор деб топилса, ижтимоий тармоқ глобал айланмасининг 6 фоизигача жаримага тортилади. 

Рақамли хизматлар тўғрисидаги қонун (DSA) «жуда катта онлайн платформалар» деб ҳисобланган компаниялардан ўзлари жойлаштирган контентни тартибга солишда қатъий қоидаларга риоя этишни талаб қилади. Қонуннинг асосий мақсади хавфсизроқ онлайн муҳитни яратишдир. Бу 19 та рақамли гигантларга, жумладан Meta, Google, Apple ва бошқа кўплаб сервисларга тааллуқли. 

Шу билан бирга, бир неча ҳафта олдин Европа комиссияси Meta компаниясига қарши июн ойидаги Европарламентга сайловлар олдидан фейк хабарлар тарқалгани бўйича иш очди. Корпорация глобал айланмасининг бир фоизигача жаримага тортилади. ЕК маълумотларига кўра, Facebook ва Instagram Европа Иттифоқида ҳар ойда 45 миллиондан ортиқ фаол фойдаланувчиларга эга. 

Kun.uz