Мусулмон оқсоқоллари кенгаши бош котиби, Муҳаммад Абдулсалом Ўзбекистон Ҳукумати ва шайх Нуриддин Холиқназаровга табригида, мамлакатимиз ва минтақамизда диний-маърифий соҳа ривожига қўшаётган ҳиссаси учун ўз миннатдорлигини билдирган. «Ўзининг бой тарихи, ранг-баранг мероси ва чуқур интеллектуал, маданий ва диний таъсирга эга бўлган мероси билан Марказий Осиёда Мусулмон оқсоқоллар кенгашининг роли ва фаолиятини ошириш мақсадида шайх Нуриддин Холиқназаров билан ҳамкорлик қилишни сабрсизлик билан кутяпмиз. Бу ҳамкорлик, шунингдек, динлараро мулоқот, бағрикенглик, жамиятда тинчлик ва тотувликни таъминлаш ҳамда ўзаро ҳурматни ривожлантиришга қаратилган», - дейди у.

Ўз навбатида, Мусулмон оқсоқоллари кенгашининг янги тайинланган аъзоси, Ўзбекистон мусулмонлари идораси раҳбари, шайх Нуриддин Холиқназаров ҳам мазкур кенгашга аъзо этиб тайинлангани ўзи ҳамда Ўзбекистон ва Марказий Осиёнинг барча халқлари учун фахр эканини таъкидлади. Шайх Нуриддин Холиқназаров, шунингдек, Ал-Азҳар бош имоми ва Мусулмон оқсоқоллари кенгаши раиси доктор Аҳмад Ат-Тойиб ҳазратлари, кенгаш аъзолари ва Бош котибга ушбу нуфузли халқаро тузилмага аъзо этиб тайинлангани учун чуқур миннатдорлик билдирди. Ўзбекистон вакили Кенгашнинг мусулмон дунёси манфаатларига хизмат қилиш, тинчликни мустаҳкамлаш, ҳамкорликни ривожлантириш, Ўзбекистонда мавжуд бўлган ислом меросини асраб-авайлашга қаратилган мақсадларига эришиш учун барча саъй-ҳаракатларни амалга оширишини алоҳида қайд этди.

Мусулмон оқсоқоллар кенгаши Абу-Дабида 2014 йилда Ал-Азҳар бош имоми доктор Аҳмад Ат-Тойиб раислигида ташкил этилган мустақил халқаро ташкилотдир. Кенгаш таркибига бир қанча олимлар ва диний –маърифий соҳанинг етук вакиллари киради. Кенгаш мақсади мусулмон ва мусулмон бўлмаган жамиятларда тинчликни таъминлаш, ўзаро мулоқотни ривожлантириш, бағрикенглик ва ҳамжиҳатлик каби чин инсоний қадриятларини тарғиб қилиш ҳамда мустаҳкамлашдан иборат.

«Янги Ўзбекистон» ва «Правда Востока» газеталари таҳририяти