Юртимизда ноябрь ойи “Кексалар туризм ойлиги” муносабати билан ушбу ойда кексаларимизнинг дам олиш вақтларини мароқли ва мазмунли ташкил этиш, ҳудудлар бўйлаб ички туризм йўналишида саёҳатларга жалб этиш мақсадида бир қатор чегирмалар жорий қилинди.

Жумладан, туризм соҳасидаги тадбиркорлик субъектлари томонидан ноябрь ойи давомида республикадаги 179 та меҳмонхона ва меҳмон уйи хизматлари учун 2-33 фоизгача ҳамда 78 та умумий овқатланиш жойидаги хизматларга 5-20 фоизгача ихтиёрий чегирмалар жорий этилди. 

Туризм қўмитаси матбуот хизматининг маълум қилишича, ноябрь ойи давомида кексаларнинг маҳаллий йўналишлар бўйлаб саёҳат қилиши учун “Uzbekistan Airways” АЖ республика ичидаги йўналишларда эркин сотувда мавжуд бўлган барча тоифадаги эконом-классдаги тарифларидан 15 фоиз чегирма тақдим этади. Ушбу чегирма Ўзбекистон Республикаси фуқаролари учун 60 ёшдан ошган эркакларга ва 55 ёшдан ошган аёлларга тақдим этилади. 

Шунингдек, “Ўзбекистон темир йўллари” АЖ томонидан нуроний нафақахўрлар (Ўзбекистон Республикаси фуқаролари 55 ёшдан юқори аёллар ҳамда 60 ёшдан юқори эркакларга) 1-30 ноябрь кунлари барча маҳаллий йўналишдаги поездларнинг (тезюрар “Афросиёб” электро поездидан ташқари) темир йўл чипталарининг тариф қисмидан 20 фоиз чегирма билан таъминланиши белгиланган. Жамият томонидан ушбу чегирмали чипталарни онлайн тарзда ҳамда барча чиптахоналарда расмийлаштириш мумкинлиги маълум қилинган. 

“Uzautotrans Service” МЧЖ томонидан ойлик давомида вилоятларга ташриф буюрувчи кексаларга ҳудудлараро йўналишларда қатновчи автобус (гуруҳ бўлиб 51 йўловчи бориши-келиши) 10 фоизгача чегирма асосида хизмат кўрсатиш имконияти мавжуд. Туристик масканларга киришда “Вақф” хайрия жамоат фонди тасарруфидаги музей ва зиёратгоҳларга ноябрь ойи давомида кексалар учун 50 фоиз чегирмалар белгиланган. 

Маданий мерос агентлиги томонидан ушбу ойлик доирасида кексалар саёҳати давомида Агентликка қарашли бўлган 114 та музей ва галереяга кириш бепул тарзда амалга оширилади. Маданият вазирлиги томонидан ноябрь ойида республикадаги театрларда намойиш этиладиган спектакллар репертуарлари рўйхати эълон қилинди. 

Муҳайё Тошқораева, ЎзА