АҚШ президенти Доналд Трамп ўн кун ичида 38 та фармонни имзолади. У мазкур кўрсаткич билан Қўшма Штатларнинг замонавий тарихидаги барча президентлар орасида етакчига айланди, деб хабар беради Axios.

Рейтингда иккинчи ва учинчи ўринларни Оқ уйнинг 46-раҳбари Жо Байден ҳамда 33-президент Ҳарри Трумэн эгаллади. Улар ўз бошқарувининг дастлабки 100 кунида 40 дан ортиқ фармонга имзо чеккан.

Давосдаги Жаҳон иқтисодий форумида чиқиш қилган Доналд Трамп сайловлардаги ғалабаси Америка учун «олтин аср»ни англатишини маълум қилганди. Шунингдек, у «сўл радикаллар сиёсатини бекор қилиш бўйича тезкор чоралар» кўрганини айтган. Трамп томонидан имзоланган дастлабки қонунлардан бири жанубий чегаралар орқали ноқонуний мигрантларнинг киришини тўхтатиш ва уларни мамлакатдан чиқариб юборишга оид. Бундан ташқари, Доналд Трамп расмийларга АҚШда туғилган болаларга фуқаролик бермасликни буюрган.

Шу билан бирга, Трамп гендер сиёсатини ўзгартиришга оид фармонларни ҳам имзолаган: энди АҚШда фақат эркак ва аёл жинси тан олинади, давлат эса вояга етмаганлар жинсини ўзгартиришини молиялаштиришни тўхтатади. Трампнинг кўплаб фармонлари инклюзивлик ва тенглик сиёсатига тааллуқли. Шунингдек, президент Капитолийдаги тартибсизликларда айбланган 1,5 мингга яқин шахсни афв этган.

Kun.uz