Жанубий Корея парламенти дарс вақтида мобиль телефон ва смарт қурилмалардан фойдаланишни тақиқловчи қонун қабул қилди. Бу тартиб 2026 йил мартидан кучга киради ва мамлакат бўйлаб барча мактабларда амал қилади. Янги амалиётдан кўзланган мақсад ёшлар орасида кенг тарқалган “online” қарамликни камайтириш. Зеро, тадқиқотлар телефондан ортиқча фойдаланиш ўқиш, ақлий ривожланиш, ижтимоий ҳаётга мослашишга салбий таъсир этаётганини кўрсатмоқда.

Депутатлар, ота-оналар ва кўплаб ўқитувчилар ўғил-қизларнинг дарсга эътиборини ошириш, дўстлик, ижодий фаолият каби қадриятларни тиклаш зарурлигини таъкидламоқда. Парламентда, овоз бериш чоғида мазкур қонун кўпчилик овоз билан қабул қилинди. Ҳукумат маълумотига кўра, аҳолининг қарийб чорак қисми телефондан ортиқча фойдаланади, ёшлар орасида эса бу кўрсаткич 43 фоизга етган. Шунга қарамай, тақиқ турли мунозараларга ҳам сабаб бўлмоқда. Табиийки, ота-оналар болалари вақтини ижтимоий тармоққа эмас, ўқиш ва ҳаётий тажрибани ўзлаштиришга сарфлашини хоҳлайди. Ўқувчилар эса тақиқ муаммони ҳал этмаслигини айтиб, аксинча телефондан оқилона фойдаланиш маданиятини шакллантириш муҳимлигини уқтирмоқда.

Ушбу расмий интизом қоидаси дарс вақтида телефондан фойдаланишни тўлиқ тақиқлайди, лекин ногиронлар учун махсус қурилмага рухсат этилиб, фавқулодда вазият ёки таълим мақсадида фойдаланишга йўл қўйилади.

Ўқитувчилар орасида ҳам турлича фикр бор: баъзилар чеклов дарс жараёнида тартибни тиклашга ёрдам беради, деса, бошқалар бу шахсий ҳуқуқни чеклаш эканини таъкидламоқда.

Жанубий Корея айни қарорга келган илк давлат эмас – Франция, Финляндия, Италия ва Хитой ҳам мактабда телефондан фойдаланишни чеклаган. Фақат Сеул масалани қонун даражасига олиб чиққани билан фарқланади. Шу билан бирга натижа қандай бўлиши ҳақидаги баҳс давом этяпти: буни кимдир ўқувчилар учун фойдали қадам, деса, бошқалар муаммо илдизи мамлакат таълим тизими ҳаддан ташқари рақобатбардошлиги, ўқувчилар руҳий босим остида экани билан боғламоқда.

Мусулмон Зиё, ЎзА