Швеция парламенти жиноий жавобгарлик ёшини 15 ёшдан 14 ёшга тушириш ҳақидаги қонунни маъқуллади. Қарор мамлакатда қуролли тўқнашувлар ва гиёҳванд моддалар савдоси билан боғлиқ жиноятлар кўпайиб бораётган бир пайтда қабул қилинди. Таъкидланишича, қонун 10 сентябрдан кучга киради, ўлкадаги умумий сайлов эса уч кундан кейин ўтказилади.
Қарорни 281 нафар депутат маъқуллаган, 66 нафари эса қарши чиққан. Ҳукумат аввал жиноий жавобгарлик ёшини 13 ёшга туширишни режалаштирган эди, аммо полиция, қамоқхона хизмати каби 126 та ташкилот бу таклифга қарши чиқди. Шу сабабли ҳукумат 13 ёшлик чегарадан воз кечди.
Қонун ёшлар учун жазо тартибини ҳам кучайтиради. 18 ёшга тўлмаган шахслар 18 йилгача озодликдан маҳрум қилиниши мумкин. Мамлакатдаги консерватив ҳукумат 2022 йилда ҳокимиятга келганидан бери жиноятчиликка қарши курашни асосий сиёсий йўналишларидан бирига айлантирган. Ҳукуматни бош вазир Ульф Кристерссон бошқаради ва у парламентда ўта ўнгчи Швеция демократик партияси кўмагига таянади.
Қонуннинг қабул қилиниши ўлкадаги сайловлар арафасига тўғри келди. Марказ-сўл мухолифат партиялари 51 фоиз овоз олиши мумкин, ҳукмрон партиялар ва ўта ўнгчи кучлар эса 47 фоиз атрофида қўллаб-қувватланмоқда. Сўров натижаларида икки томон ўртасидаги фарқ қисқараётгани қайд этилган.
Мусулмон Зиё, ЎзА