Аввал хабар берганимиздек, эртага Фарғонада биринчи тинчлик форуми бўлиб ўтади. Бугун водий марказига қирққа яқин давлатдан бир неча юз нафар сиёсатчи, халқаро ташкилот раҳбари ва вакиллари, олимлар, халқаро экспертлар етиб келдилар. Улар минтақада халқаро бирдамлик, ҳамкорлик ва барқарор тинчликни қарор топтириш масалаларини муҳокама қиладилар.

Мазкур нуфузли форум меҳмонлари бўлган Марказий Осиё, Европа ва Америкадан келган иштирокчилар мулоқот, ишонч ва яхши қўшничиликни мустаҳкамлаш, тинчлик ва тараққиётга хизмат қиладиган ҳамкорлик платформасини яратишмоқчи.

Шу муносабат билан бу йил илк бор “Бирдамлик куни – Интимак куни” ҳам нишонланади.

Бугун форум иштирокчилари Риштон туманидаги машҳур кулолчилик марказларидан бири – “Мингбоши керамик” музейига ташриф буюришди. Меҳмонлар Риштон кулолчилигининг бой тарихи, юксак анъаналари ва миллий услубда яратилган керамика буюмлари билан яқиндан танишдилар.

Музейда намойиш этилган турли хил буюмлар – ошхона жиҳозлари, безакли асарлар ҳамда юксак маҳорат билан яратилган керамика маҳсулотлари иштирокчиларда катта таассурот қолдирди. Шунингдек, меҳмонлар кулолчилик буюмларини тайёрлаш жараёнини ҳам қизиқиш билан кузатдилар.

Форум қатнашчилари Риштон кулолчилиги нафақат миллий мерос, балки Ўзбекистоннинг маданий дипломатиясини юксак намоён этувчи муҳим соҳалардан бири эканини таъкидладилар.

Муҳаммаджон Обидов,  

ЎзА