Жорий йилнинг 20 апрель куни Олий Мажлис Қонунчилик палатаси Спикерининг биринчи ўринбосари А.Саидов Корея халқаро ҳамкорлик агентлиги (KOICA)нинг Ўзбекистондаги офиси директори Пак Сунджин билан учрашди.
Мулоқот аввалида сўнгги йилларда Ўзбекистон ва Корея давлатлари Президентларининг сиёсий иродаси ва қатъияти туфайли икки томонлама муносабатлар янги босқичга чиққани, жумладан парламентлараро алоқалар мустаҳкамланиб бораётгани қайд этилди.
Мамлакатларимиз парламентлараро алоқани жадал ривожлантираётгани, 1995 йил Корея Республикаси Миллий Ассамблеясида “Корея – Ўзбекистон” парламент дўстлик уюшмаси ташкил этилгани, 2005 йилдан эса Олий Мажлиснинг Корея Республикаси Миллий Ассамблеяси билан ҳамкорлик бўйича парламентлараро гуруҳи фаолият юритаётгани таъкидланди.
Учрашувда Ўзбекистон Республикаси Олий Мажлиси Қонунчилик палатасига Корея Республикаси Миллий Ассамблеясининг тажрибасини татбиқ этилиши бўйича Кореянинг халқаро ҳамкорлик агентлиги (KOICA) “Олий Мажлис Қонунчилик палатасида Электрон парламент тизимини такомиллаштириш” лойиҳасининг режаси ва унинг йўналишлари ҳам муҳокама қилинди.
Шунингдек, Олий Мажлис Қонунчилик палатасида рақамлаштиришнинг бугунги ҳолати ва ўзаро ҳамкорлик режалари ҳамда малака ошириш дастурлари юзасидан фикр алмашилди.
Учрашув дўстона ва конструктив рухда бўлиб ўтди.