АР-РИЁЗ, 4 апрель. /"Дунё" АА/. Саудия Арабистонининг "Al Harir" газетаси "Тошкент парламент дипломатияси маркази сифатида: Парламентлараро иттифоқнинг юбилей ассамблеяси" сарлавҳали мақола эълон қилинди, деб хабар қилмоқда "Дунё" АА мухбири.

Унда жорий апрель ойида Тошкент Марказий Осиё тарихида биринчи марта Парламентлараро иттифоқнинг 150-юбилей ассамблеясини қабул қилиши таъкидланган.

Қайд этилишича, ушбу тадбир 100 дан ортиқ миллий парламентлардан 2000 дан ортиқ парламент аъзоларини бирлаштиради, бу эса асосий глобал масалаларни муҳокама қилиш учун ноёб имконият яратади.

"Тошкентнинг ушбу муҳим тадбир учун майдон сифатида танланиши Янги Ўзбекистоннинг халқаро парламент дипломатиясидаги таъсири ортиб бораётганини ва унинг демократик ислоҳотларга содиқлигини таъкидлайди", – деб ёзган электрон нашр.

Саудия ОАВга кўра, Парламентлараро иттифоқнинг 150-юбилей ассамблеясининг Тошкентда ўтказилиши нафақат мамлакат учун тарихий воқеа, балки Марказий Осиёда парламент дипломатиясини ривожлантиришда янги босқичдир.

Мақолада Ўзбекистоннинг Парламентлараро иттифоқ билан ҳамкорлиги амалий ва институционал характерга эга эканлиги қайд этилан. Ўзбекистон Олий Мажлис палаталари вакиллари Ижроия қўмитада, турли қўмиталарда фаол ишладилар, шунингдек, Парламентлараро Иттифоқнинг хотин-қизлар ва ёшлар форумларида иштирок этдилар.

"Шунингдек, сўнгги йилларда Ўзбекистонда парламентнинг ролини кучайтириш, унинг ваколатларини кенгайтириш ва демократик механизмларни жорий этишда сезиларли ютуқларга эришилди", –дейилади "Al Harir" мақоласида.