БОКУ, 3 ноябрь. /Дунё" АА/. Озарбайжонлик сиёсатшунос ва "hafta.az" электрон нашри мухбири Вусал Тагибайли "Дунё" АА учун интервьюсида Ўзбекистон Президенти Шавкат Мирзиёевнинг 30 октябрь куни Самарқандда бўлиб ўтган ЮНЕСКО Бош конференцияси 43-сессиясининг очилиш маросимидаги нутқи ҳақидаги фикрларини билдирди:

– Ташкилот ташкил этилганининг 80 йиллиги муносабати билан Самарқандда ЮНЕСКОнинг 43-Бош конференциясининг ўтказилиши Марказий Осиёнинг марказида жойлашган Ўзбекистоннинг халқаро нуфузи ортиб бораётганининг яққол далилидир.

Ўзининг бой маданий мероси билан Ўзбекистон бутун дунёдан келган сайёҳлар учун севимли масканга айланди. Марказий Осиёнинг қадимий цивилизацияси изларини сақлаб қолган бу ажойиб мамлакат минтақа учун илм-фан ва маданият маркази бўлиб қолишга интилаётгани алоҳида эътиборга лойиқдир. Бугунги тадбирнинг Ўзбекистон учун аҳамиятини бир неча жиҳатдан баҳолаш мумкин. Биринчидан, бу Ўзбекистоннинг сиёсий майдонда қўлга киритган глобал ҳурматини акс эттиради. Мамлакатнинг давом этаётган ислоҳотлари ва дунёга очиқлик сиёсати халқаро ҳамжамият эътиборидан четда қолмади.

Иккинчидан, бу минтақа тарихидаги энг йирик конференция. Бундай халқаро тадбирлар минтақага қизиқишнинг ортишига ва хорижий инвестицияларнинг оқимига ҳисса қўшади.

Учинчидан, глобал ташкилот бўлган ЮНЕСКОнинг 40 йилдан сўнг биринчи марта Париждан ташқарида, хусусан, Самарқандда ўз конференциясини ўтказаётгани шаҳарнинг ривожланаётган маданий марказидан далолат беради.

Менимча, ЮНЕСКО Бош конференциясини Самарқандда ўтказиш Ўзбекистон ва унинг раҳбарияти учун шубҳасиз муваффақият бўлиб, халқаро ҳамжамиятга мамлакат маданияти, турмуш тарзи ва сиёсий ва иқтисодий ютуқлари билан кўпроқ танишиш имконини беради.